Joan zen ostegunean, apirilaren 7an, EGOD egitasmoaren emaitzak (Euskararen Gaineko Oinarrizko Diskurtsoak) eta euskararen gaineko diskurtso partekaturako zoru komunaren oinarriak aurkezteko bi bilera biziki interesgarri egin genituen Bilbon. Iñaki Martinez de Luna eta biok aritu ginen aurkezpen lanetan. Dagoeneko, bi bilera hauen aurretik, bospasei bilera eginak ditugu helburu berarekin, euskal gizarteko askotariko eragileekin. Aurreko bileretan bezala, batzar hauetan ere parte hartu zuen Jorge Gimenezek, Euskararen Aholku Batzordeko idazkari eta HPSko zuzendaritzako kideak.
Lehen bilera goizean izan zen, CCOO eta STEE-EILAS sindikatuetako ordezkariekin. Euskararen sustapenerako bereziki hezkuntza arloan egin beharrekoak izan genituen hizpide, ikuspuntuak kontrastatuz elkarrizketa aberatsean.
Arratsaldean, Euskadiko euskaltegien sare guztiekin batzartu ginen. Bi orduko bilera izatea espero genuena ia lau orduko bilera bihurtu zen. Bilera oso-oso interesgarria, lankidetza giro aberatsean eta elkarlan izpirituak hauspotuta. Elkarrizketa luze bezain emankorra izan genuen. Jardunaldi oparoa, ezbairik gabe. HABEren zuzendari nagusi Joseba Erkiziak ere parte hartu zuen bileran. Bertan izan ziren, esan bezala, euskaltegien sare publiko nahiz pribatu homologatu guztien ordezkariak, sei sare: AEK, IKA, BATUZ, ELKARLAN, Barnetegiak eta Udal Euskaltegiak.
Iñaki Martínez de Luna eta biok izan ginen aurkezpenetan.
CCOO eta STEE-EILAS sindikatuekin izandako bileraren argazkia.
Zeharo aberasgarria izan zen euskaltegietako ordezkariekin egindako bilera.
Euskaltegietako ordezkariek euren iritziak, kezkak eta ekarpenak helarazi zizkiguten.
