Joan zen udan, 2018ko ekainaren 7 eta 8an, simposium bat izan zen Okzitaniako Tolosako Unibertsitatean, ondorengo izenburu hau zuena: ‘Langues régionales et construction de l’État en Europe’ (‘Eskualdeetako hizkuntzak eta Estatuaren eraikuntza Europan’). Amane Gogorza eta Wanda Mastor Université Toulouse 1 Capitoleko irakasleak izan ziren simposiumaren zuzendari. Blog honetan idatzi nuen hari buruzko kronika 2018-06-30ean. Kronika hartan eskura dago, beraz, simposiumeko parte hartzaile eta aztergaiei buruzko informazioa. Ohar honetan biltzar hartako mintzaldiekin osatutako bideoaren lotura jartzen dut. Toulouse 1 Capitole Unibertsitateko zerbitzuek moldatutako bideoa da. Hitzaldi gehienak daude bertan, eta pantaila gainean kurtsorea mugiaraziz aurkitu eta ikus daitezke guztiak banan-banan.
http://www.dailymotion.com/embed/playlist/x6a63m
Simposiumean egindako mintzaldiak bilduko dituen argitalpena etorriko da laster, Frantziako Lextenso Éditions argitaletxearen eskutik.Hogei hizlari aritu ginen simposiumean. Nire mintzaldia izan zen hizkuntza gutxituen balio ekonomikoari buruz, besteak beste hizkuntza-aurreiritzien eraginez hizkuntza horiei ukatua zaien balio ekonomikoari buruz, hain zuzen ere. Hizkuntza-aurreiritzien pisuari buruz gogoeta egitearekin batera, euskararen balio ekonomikoari buruz aritu nintzen, besteak beste 2015ean Eusko Jaurlaritzaren ekimen eta enkarguz Siadecok egin zuen azterlaneko datu estatistikoak baliatuz (11. bideoa).
